Cores es un jua de cartas cual es fundida sur la gol de evade la prende de cartas. La jua es tipal juada par cuatro persones.
La juas de cores ia developa en la sentenio 16, evoluida de la jua reversin, per sua gol de gania tan minima de prendes en loca de la plu comun gol de gania la masima. Lo es suposada ce lo ia comensa en la corte de Francis 1, ci rena Frans de 1515 a 1547. En Italia, lo es posible relatada a juas como rovescino. Lo deveni popular con la nom reversis sirca 1750 en Espania. Lo deveni popular en Nederland con la nom Hartenjagen ("xasa de cores"). La regulas moderna ia es fisada sirca 1850. En la SUA, lo apare prima sirca 1880. La jua orijinal ia es cuasi completa reponeda par Maria Negra, cual difere minimal de la orijinal.
La Standard Hoyle de 1887 ia reporta ce lo ia es juada en la SUA. Lo ia descrive lo como un jua sin trumfo, per cuatro juores, usante un paceta completa de cartas.
La gol de cores es la evade de prende cartas de la familia cor (e la dama o pajo de spadas, si on inclui los en la jua). On pote usa paper e lapis, o cada juor pote comensa con un cuantia de pesos per manteni sua puntos (tipal 25 o 50).
Un paceta de 52 cartas es usada, e 13 cartas per person es distribuida, an tal un paceta de 36 es ance posible, con 9 cartas per person. La juor prima alora pone un de sua cartas a la table. La otra juores segue, e debe segue la familia de la carta prima si posible. Si no, cualce carta es permeteda.
On ave du varias regardante puntos: En un, la familia de cores ave esta valuas: As 14, Re 13, Rea 12, Pajo 11, e la otras a sua valua. La otra sistem ia es As 5, Re 4, Rena 3, Pajo 2, e la otras un punto. La dama de spadas (D♠ o "Maria Negra") ia es introduida sirca 1909 en la SUA e en Britan sirca 1939, valuada a 13 puntos. La pajo de spadas (C♠ o "Jac Negra") ia es ance ajuntada par algas, con un valua de 10 puntos. Nota ce la puntos es en realia negativa, e la plu puntos ce tu colie, la plu mal tua situa!
Un regula elejable es nomida "fusili la luna" o simil. Un juor con un mano de cartas miserable pote atenta catura tota la cartas con puntos negativa. Si un juor susede en prende tota cartas con puntos negativa, on ave du varias de recompensa la juor: Sua puntos pote resta sin cambia, ma la otra juores reseta 26 puntos de puni. Esta es nomida "la regula de luna vea". En la otra varia, la juor sutrae 26 de sua propre puntos.